ਸਿਰੇ ਤੱਕ ਹੈਵਾਨੀਅਤ
ਨਾਲ਼ ਭਰ ਗਿਆ ਹੈ ਆਦਮੀ।
ਆਦਮੀ ਦੇ ਅੰਦਰੋਂ ਹੁਣ
ਮਰ ਗਿਆ ਹੈ ਆਦਮੀ।
ਆਪਣੇ ਹੱਥੀਂ ਨੇ ਸਿਰਜੇ
ਮੌਤ ਦੇ ਸਾਮਾਨ ਜੋ
ਲੱਗਦੈ ਓਹਨਾਂ ਤੋਂ ਪਰ
ਕੁੱਝ ਡਰ ਗਿਆ ਹੈ ਆਦਮੀ।
ਚੱਲਿਆ ਸੀ ਕਰਨ ਕਬਜ਼ਾ ਇਹ
ਖ਼ੁਦਾ ਦੇ ਤਖ਼ਤ ਤੇ
ਆਪਣੇ ਹੀ ਗਿਆਨ ਹੱਥੋਂ
ਹਰ ਗਿਆ ਹੈ ਆਦਮੀ।
ਰੋਸ਼ਨੀ ਦੇ ਭੰਵਰ ਵਿੱਚ ਫਸ ਗਈ
ਕਿਸ਼ਤੀ ਏਸ ਦੀ
ਨ੍ਹੇਰ ਦਾ ਸਾਗਰ ਭਿਆਨਕ ਤਰ
ਗਿਆ ਹੈ ਆਦਮੀ।
ਲਾਲਸਾ ਦੁਨੀਆਂ ਤੇ ਭਾਰੂ
ਹੋਣ ਦੀ ਦਾ ਬਣ ਗੁਲਾਮ
ਆਪਣੇ ਬੇੜੇ ਚ ਵੱਟੇ ਭਰ ਗਿਆ
ਹੈ ਆਦਮੀ।
ਅੰਬਰਾਂ ਤੋਂ ਪਾਰ ਅੰਬਰ
ਛਾਣਨੇ ਵਿੱਚ ਉਲ਼ਝਿਆ
ਲੱਗਿਆ ਨਾ ਪਤਾ ਕਦ ਨਿੱਘਰ
ਗਿਆ ਹੈ ਆਦਮੀ।
ਖ਼ੁਦ ਦੇ ਖ਼ੁਦ ਤੇ ਵਾਰ ਤੋਂ
ਬਚਣਾ ਨਹੀਂ ਸੰਭਵ ਪਨਾਗ
ਦੁਸ਼ਮਣਾ ਦੇ ਵਾਰ ਤਾਂ ਸਭ ਜਰ
ਗਿਆ ਹੈ ਆਦਮੀ।
No comments:
Post a Comment