ਰਾਜਿਆ ਰਾਜ
ਕਰੇਂਦਿਆ ਫੋਕੀ ਤੇਰੀ ਸ਼ਾਨ।
ਰਾਜ ਤੇਰੇ
ਵਿੱਚ ਰੁਲ਼ ਰਿਹਾ ਸੜਕਾਂ ਤੇ ਭਗਵਾਨ।
ਰਾਜਿਆ ਰਾਜ
ਕਰੇਂਦਿਆ ਸੁਣ ਸੁਣ ਅੰਬਰ ਰੋਣ।
ਆਖੇਂ ਤਖ਼ਤ
ਬਹਾਲਣਾ ਰੋਟੀ ਲੱਗਿਆ ਖੋਹਣ।
ਰਾਜਿਆ ਰਾਜ
ਕਰੇਂਦਿਆ ਸੜਕੀਂ ਰੋਲ਼ੇਂ ਜੱਟ।
ਅਪਣੇ ਹੱਥੀਂ
ਆਪਣੀ ਕਬਰ ਰਿਹਾ ਹੈਂ ਪੱਟ।
ਰਾਜਿਆ ਰਾਜ
ਕਰੇਂਦਿਆ ਭਾਅ ਚੜ੍ਹ ਗਏ ਅਸਮਾਨ।
ਰੋਂਦਾ ਤੇਰੀ
ਜਾਨ ਨੂੰ ਸਾਰਾ ਹਿੰਦੁਸਤਾਨ।
ਰਾਜਿਆ ਰਾਜ
ਕਰੇਂਦਿਆ ਉਡ ਉਡ ਪੈਂਦੀ ਰੇਤ।
ਕੰਡੇ ਜੇਕਰ
ਬੀਜੀਏ ਕੰਡੇ ਈ ਉੱਗਣ ਖੇਤ।
ਰਾਜਿਆ ਰਾਜ
ਕਰੇਂਦਿਆ ਝੂਠ ਨੂੰ ਆਖੇਂ ਸੱਚ।
ਹੀਰਾ ਹੀਰਾ
ਆਖਿਆਂ ਹੀਰਾ ਬਣੇ ਨਾ ਕੱਚ।
ਰਾਜਿਆ ਰਾਜ
ਕਰੇਂਦਿਆ ਹੱਥ ਅਕਲ ਨੂੰ ਮਾਰ।
ਕਰੇ ਗੁਨਾਹ
ਬਹਿ ਤਖ਼ਤ ਤੇ ਬਖ਼ਸ਼ੇ ਨਾ ਕਰਤਾਰ।
ਰਾਜਿਆ ਰਾਜ
ਕਰੇਂਦਿਆ ਸੁਪਨੇ ਨਾਂ ਤੂੰ ਵੇਖ।
ਪੜ੍ਹ ਲੈ
ਅੱਖਾਂ ਖੋਲ੍ਹ ਕੇ ਕੰਧ ਤੇ ਲਿਖਿਆ ਲੇਖ।
ਰਾਜਿਆ ਰਾਜ
ਕਰੇਂਦਿਆ ਕੌੜਾ ਸੱਚ ਨਾ ਭੁੱਲ।
ਬੰਦਾ ਜੇ ਰੱਬ
ਬਣ ਬਹੇ ਖਾਕ ਚ ਜਾਂਦਾ ਰੁਲ।
ਰਾਜਿਆ ਰਾਜ
ਕਰੇਂਦਿਆ ਕਹਿੰਦਾ ਸੱਚ ਪਨਾਗ।
ਵਾੜ ਹੀ ਲੱਗ
ਜਾਏ ਖਾਣ ਜੇ ਉੱਜੜ ਜਾਂਦੇ ਬਾਗ।
No comments:
Post a Comment