ਤਾਰਿਆਂ ਨੂੰ ਹੱਥ ਵਿੱਚ ਉਹ ਸ਼ਖਸ ਫੜ ਸਕਦਾ ਨਹੀਂ।
ਅੰਬਰਾਂ ਨੂੰ ਛੂਹਣ ਦੇ ਸੁਪਨੇ ਜੋ ਘੜ ਸਕਦਾ ਨਹੀਂ।
ਦੇਖ ਕੇ ਚੂਹੇ ਨੂੰ ਜੋ ਥਰ ਥਰ ਹੈ ਕੰਬਣ ਲੱਗਦਾ
ਮੁਸ਼ਕਲਾਂ ਦੇ ਨਾਲ਼ ਬਣ ਕੇ ਸ਼ੇਰ ਲੜ ਸਕਦਾ ਨਹੀਂ।
ਹਰ ਕਿਸੇ ਦੇ ਲਈ ਉਹ ਬਣਿਆਂ ਬੇਗਾਨਾ ਰਹੇਗਾ
ਬਣ ਕੇ ਮਿੱਠਾ ਜੋ ਕਿਸੇ ਦੇ ਦਿਲ ਚ ਵੜ ਸਕਦਾ ਨਹੀਂ।
ਜ਼ਿੰਦਗੀ ਦੀ ਕਲਾ ਤੋਂ ਉੱਕਾ ਹੀ ਹੈ ਅਣਜਾਣ ਉਹ
ਕਿਸੇ ਦੇ ਜਜ਼ਬਾਤ ਜੋ ਚਿਹਰੇ ਤੋਂ ਪੜ੍ਹ ਸਕਦਾ ਨਹੀਂ।
ਆਪਣੇ ਹੀ ਤੱਕ ਸੀਮਤ ਸੋਚ ਹੈ ਜਿਸ ਬਸ਼ਰ ਦੀ
ਖ਼ੂਬਸੂਰਤ ਨਗ ਰਿਸ਼ਤਿਆਂ ਵਿੱਚ ਜੜ ਸਕਦਾ ਨਹੀਂ।
ਖ਼ੁਦ ਹਿਫ਼ਾਜ਼ਤ ਆਪਣੀ ਜੋ ਕਰਨ ਦੇ ਕਾਬਲ ਨਹੀਂ
ਨਾਲ਼ ਦੂਜੇ ਦੇ ਉਹ ਬਣ ਕੇ ਢਾਲ਼ ਖੜ੍ਹ ਸਕਦਾ ਨਹੀਂ।
ਜਦ ਪਨਾਗਾ ਜ਼ੁਲਮ ਅੱਗੇ ਡਟ ਕੇ ਖੜ੍ਹ ਜਾਏ ਅਵਾਮ
ਦਲ ਕੋਈ ਜ਼ਾਲਮ ਦਾ ਅੱਗੇ ਉਸ ਦੇ ਅੜ ਸਕਦਾ ਨਹੀਂ।