ਸ਼ੇਰਾਂ ਕੋਲ਼ੋਂ ਜਿਹੜਾ ਮਾਸ ਦੀ ਆਸ ਕਰੇ।
ਇਹਦੇ ਨਾਲ਼ੋਂ ਬਿਹਤਰ ਹੈ ਉਪਵਾਸ ਕਰੇ।
ਨਾ ਸ਼ੈਤਾਨ ਵੀ ਉਸ ਦਾ ਕੁੱਝ ਵਿਗਾੜ ਸਕੇ
ਮਾਲਕ ਨੂੰ ਜੋ ਚੇਤੇ ਸਾਸ ਗਿਰਾਸ ਕਰੇ।
ਸੱਜਣਾ ਲਈ ਤਾਂ ਸਾਰੀ ਦੁਨੀਆਂ ਕਰਦੀ ਹੈ
ਬੰਦਾ ਉਹ ਜੋ ਦੁਸ਼ਮਣ ਲਈ ਅਰਦਾਸ ਕਰੇ।
ਬਣ ਕਿਰਪਾਨ ਹੈ ਆਉਂਦੀ ਦੀਨ ਦੀ ਰਾਖੀ ਲਈ
ਬਣ ਤਲਵਾਰ ਜੋ ਜਬਰ ਜ਼ੁਲਮ ਦਾ ਨਾਸ ਕਰੇ।
ਹੱਥ ਓਹੀ ਹੈ ਛੂਹ ਸਕਦਾ ਅਸਮਾਨਾਂ ਨੂੰ
ਇਮਤਿਹਾਨ ਜੋ ਅਪਣੇ ਬਲ ਤੇ ਪਾਸ ਕਰੇ।
ਹਿੰਮਤ, ਲਗਨ, ਹੌਸਲਾ ਉਹ ਕਰ ਦਿੰਦੇ ਨੇ
ਖ਼ਾਬ ਚ ਵੀ ਨਾ ਕਾਇਰ ਜਿਸ ਦਾ ਕਿਆਸ ਕਰੇ।
ਵੈਰੀ ਵੀ ਨਾ ਓਨਾ ਕਰ ਨੁਕਸਾਨ ਸਕੇ
ਬੁੱਕਲ਼ ਵਿੱਚ ਬਹਿ ਜਿੰਨਾ ਅਪਣਾ ਖਾਸ ਕਰੇ।
ਅਕਲ ਪਨਾਗਾ ਲਾ ਲਾ ਜ਼ੋਰ ਹੈ ਥੱਕ ਜਾਂਦੀ
ਟੁੱਟਿਆ ਦਿਲ ਪਰ ਫਿਰ ਵੀ ਨਾ ਧਰਵਾਸ ਕਰੇ।
No comments:
Post a Comment