ਪਹਿਲਾ ਪਿਆਰ ਕਦੇ ਨਹੀਂ ਭੁੱਲਦਾ
ਪਹਿਲਾ ਪਿਆਰ ਕਦੇ ਨਹੀਂ ਭੁੱਲਦਾ, ਜਿਗਰੀ ਯਾਰ ਕਦੇ ਨਹੀਂ ਭੁੱਲਦਾ।
ਜੀਹਨੂੰ ਹੱਥੀਂ ਦਿਲ ਦੇ ਦਈਏ ਉਹ ਦਿਲਦਾਰ ਕਦੇ ਨਹੀਂ ਭੁੱਲਦਾ।
ਪੌੜੀ ਦਿਨ ਸਾਲਾਂ ਦੀ ਚੜ੍ਹਦਿਆਂ, ਨਾਲ਼ ਝਮੇਲਿਆਂ ਦੇ ਨਿੱਤ ਲੜਦਿਆਂ,
ਪਹਿਲਾ ਫੁੱਲ ਸੀ ਜਿਸ ਦਿਨ ਖਿੜਿਆ ਰੋਜ਼ ਬਹਾਰ ਕਦੇ ਨਹੀਂ ਭੁੱਲਦਾ।
ਪਹਿਲਾ ਪਿਆਰ ਕਦੇ ਨਹੀਂ ਭੁੱਲਦਾ, ਜਿਗਰੀ ਯਾਰ ਕਦੇ ਨਹੀਂ ਭੁੱਲਦਾ।
ਜੱਗ ਦੀ ਕੀਤੀ ਵੀ ਭੁੱਲ ਜਾਂਦੀ, ਦਾਰੂ ਪੀਤੀ ਵੀ ਭੁੱਲ ਜਾਂਦੀ,
ਉਹਦੀਆਂ ਅੱਖਾਂ ਦੇ ਵਿੱਚ ਵਸਦਾ ਮਸਤ ਖੁਮਾਰ ਕਦੇ ਨਹੀਂ ਭੁੱਲਦਾ।
ਪਹਿਲਾ ਪਿਆਰ ਕਦੇ ਨਹੀਂ ਭੁੱਲਦਾ, ਜਿਗਰੀ ਯਾਰ ਕਦੇ ਨਹੀਂ ਭੁੱਲਦਾ।
ਖੀਰਾਂ ਪੂੜੇ ਨੇ ਭੁੱਲ ਜਾਂਦੇ, ਮਿੱਤਰ ਗੂੜ੍ਹੇ ਨੇ ਭੁੱਲ ਜਾਂਦੇ,
ਉਹਦੀ ਛੋਹ ਨਾਲ਼ ਦਿਲ ਨੂੰ ਚੜ੍ਹਿਆ ਤੇਜ਼ ਬੁਖਾਰ ਕਦੇ ਨਹੀਂ ਭੁੱਲਦਾ।
ਪਹਿਲਾ ਪਿਆਰ ਕਦੇ ਨਹੀਂ ਭੁੱਲਦਾ, ਜਿਗਰੀ ਯਾਰ ਕਦੇ ਨਹੀਂ ਭੁੱਲਦਾ।
ਉਹਤੋਂ ਦਿਲ ਮੰਗਣਾ ਨਹੀਂ ਭੁੱਲਦਾ, ਨੀਂਵੀਂ ਪਾ ਸੰਗਣਾ ਨਹੀਂ ਭੁੱਲਦਾ।
ਉਹਦਾ ਡਰਦੇ ਡਰਦੇ ਕੀਤਾ ਕੌਲ ਕਰਾਰ ਕਦੇ ਨਹੀਂ ਭੁੱਲਦਾ।
ਪਹਿਲਾ ਪਿਆਰ ਕਦੇ ਨਹੀਂ ਭੁੱਲਦਾ, ਜਿਗਰੀ ਯਾਰ ਕਦੇ ਨਹੀਂ ਭੁੱਲਦਾ।
ਭੋਗੇ ਸਾਰੇ ਸੁਖ ਭੁੱਲ ਜਾਂਦੇ, ਕੱਟੇ ਸਾਰੇ ਦੁੱਖ ਭੁੱਲ ਜਾਂਦੇ।
ਉਹਦਾ ਡੋਲ਼ੀ ਦੇ ਵਿੱਚ ਬਹਿੰਦਿਆਂ ਮੰਨਣਾ ਹਾਰ ਕਦੇ ਨਹੀਂ ਭੁੱਲਦਾ।
ਪਹਿਲਾ ਪਿਆਰ ਕਦੇ ਨਹੀਂ ਭੁੱਲਦਾ, ਜਿਗਰੀ ਯਾਰ ਕਦੇ ਨਹੀਂ ਭੁੱਲਦਾ।
ਜਿੱਤਾਂ ਹਾਰਾਂ ਯਾਦ ਨਾ ਰਹਿੰਦੀਆਂ, ਮਾਰੀਆਂ ਮਾਰਾਂ ਯਾਦ ਨਾ ਰਹਿੰਦੀਆਂ।
ਰੋਣਾ ਹੋ ਕੇ ਯਾਰ ਪਨਾਗਾ ਬੇ-ਅਖ਼ਤਿਆਰ ਕਦੇ ਨਹੀਂ ਭੁੱਲਦਾ।
ਪਹਿਲਾ ਪਿਆਰ ਕਦੇ ਨਹੀਂ ਭੁੱਲਦਾ, ਜਿਗਰੀ ਯਾਰ ਕਦੇ ਨਹੀਂ ਭੁੱਲਦਾ।
