ਨ੍ਹੇਰੀ ਬਣ ਅੱਜ ਯਾਦਾਂ ਆਈਆਂ ਜਦੋਂ ਹਾਣੀਆਂ ਦੀਆਂ।
ਗਈਆਂ ਖੋਲ੍ਹ ਕਿਤਾਬਾਂ ਬਚਪਨ ਦੀਆਂ ਕਹਾਣੀਆਂ ਦੀਆਂ।
ਕੁੱਝ ਤੁਰ ਗਏ ਕੁੱਝ ਏਧਰ ਓਧਰ ਖਿੱਲਰੇ ਬੈਠੇ ਨੇ
ਮੁੱਕ ਗਈਆਂ ਨੇ ਸਾਂਝਾਂ ਚਾਹਾਂ ਅਤੇ ਪਾਣੀਆਂ ਦੀਆਂ।
ਸਭ ਕੁੱਝ ਮਿਲਿਐ ਜਿੰਦਗੀ ਤੋਂ ਸ਼ਿਕਵਾ ਨਹੀਂ ਕੋਈ ਪਰ
ਰੀਸਾਂ ਨਹੀਂ ਮਾਪਿਆਂ ਦੇ ਸਿਰ ਤੇ ਮੌਜਾਂ ਮਾਣੀਆਂ ਦੀਆਂ।
ਹੁਣ ਨਾ ਟੱਲੀਆਂ ਸੁਣਦੀਆਂ ਬਲ਼ਦਾਂ ਦੇ ਗਲ਼ ਖੜਕਦੀਆਂ
ਤੜਕਸਾਰ ਨਾ ਸੁਣਨ ਅਵਾਜਾਂ ਕਿਤੇ ਮਧਾਣੀਆਂ ਦੀਆਂ।
ਦੁਧੀਂ ਨ੍ਹਾਵੇਂ ਪੁੱਤੀਂ ਫਲ਼ੇਂ ਨਾ ਕੇਈ ਕਹਿੰਦੀ ਹੁਣ
ਦਿੱਤੀਆਂ ਵਕਤ ਅਸੀਸਾਂ ਬਦਲ ਬਜੁਰਗ ਸੁਆਣੀਆਂ ਦੀਆਂ।
ਗੋਡੇ ਦੁਖਦੇ ਇੱਕ ਦੇ ਮੋਢੇ ਦੁਖਦੇ ਦੂਜੇ ਦੇ
ਰਹੀਆਂ ਨਹੀਂ ਤਸੀਰਾਂ ਹੁਣ ਉਹ ਹਵਾ ਪਾਣੀਆਂ ਦੀਆਂ।
ਲੁੱਟਾਂ ਖੋਹਾਂ ਖੁਦਕਸ਼ੀਆਂ ਹੱਤਿਆਵਾਂ ਜਬਰ ਜਨਾਹ
ਬੱਸ ਏਹੋ ਰਹਿ ਗਈਆਂ ਖ਼ਬਰਾਂ ਪੰਜ ਪਾਣੀਆਂ ਦੀਆਂ।
ਮੁੱਕਣ ਦੇ ਰਾਹ ਪੈ ਗਈ ਦੁਨੀਆਂ ਧੀਆਂ ਰਹੀ ਮੁਕਾ
ਕੁੱਖਾਂ ਵਿੱਚੋ ਚੀਖਾਂ ਆਉਂਦੀਆਂ ਸੁਣਨ ਨਿਮਾਣੀਆਂ ਦੀਆਂ।
ਸ਼ੋਰ ਪਨਾਗਾ ਸੁਣਦਾ ਹਰ ਥਾਂ ਲੱਚਰ ਗੀਤਾਂ ਦਾ
ਭੁੱਲ ਚੱਲੀਆਂ ਨੇ ਸੁਣੀਆਂ ਹੋਈਆਂ ਤੁਕਾਂ ਬਾਣੀਆਂ ਦੀਆਂ।
No comments:
Post a Comment