ਬਿਨ ਤੇਰੇ ਸੱਜਣਾ ਵੇ
ਝੂਠੀਆਂ ਦਿਲਜੋਈਆਂ ਹੈ ਕਰਦਾ
ਰਹਿੰਦਾ ਇਹ ਜੱਗ ਸਾਰਾ।
ਬਿਨ ਤੇਰੇ ਸੱਜਣਾ ਵੇ ਮੇਰਾ
ਹੋਰ ਨਾ ਕੋਈ ਸਹਾਰਾ।
ਬਣ ਬਣ ਕੇ ਅਪਣੇ ਵੇ ਲੋਕੀ
ਦਿੰਦੇ ਰਹਿਣ ਦਿਲਾਸੇ।
ਸੂਈਆਂ ਬਣ ਚੁਭਦੇ ਨੇ ਹੱਸਦੇ
ਉਹ ਜੋ ਨਕਲੀ ਹਾਸੇ।
ਦਿਲ ਸੁਣ ਕੇ ਹੋ ਜਾਂਦੈ
ਪਹਿਲਾਂ ਨਾਲ਼ੋਂ ਵੀ ਵੱਧ ਭਾਰਾ।
ਬਿਨ ਤੇਰੇ ਸੱਜਣਾ ਵੇ ਮੇਰਾ
ਹੋਰ ਨਾ ਕੋਈ ਸਹਾਰਾ।
ਰੁੱਤ ਆਏ ਬਹਾਰ ਜਦੋਂ ਚਾਰੇ
ਪਾਸੇ ਛਾ ਜਾਏ ਖੇੜਾ।
ਖਾਂਦਾ ਵੱਢ ਵੱਢ ਮੈਨੂੰ
ਫੁੱਲਾਂ ਨਾਲ਼ ਮਹਿਕਦਾ ਵਿਹੜਾ।
ਦਿਲ ਡੋਲਣ ਲੱਗ ਜਾਂਦਾ ਜਿੱਦਾਂ
ਬੇਤਲ ਦੇ ਵਿੱਚ ਪਾਰਾ।
ਬਿਨ ਤੇਰੇ ਸੱਜਣਾ ਵੇ ਮੇਰਾ
ਹੋਰ ਨਾ ਕੋਈ ਸਹਾਰਾ।
ਹਨ ਅੰਗ ਤੇ ਸਾਕ ਬੜੇ ਪਰ ਨਾ ਥਾਂ ਲੈ ਸਕਦੇ ਤੇਰੀ।
ਰਹੇ ਲੱਭਦੀ ਤੈਨੂੰ ਹੀ ਹਰ ਪਲ ਨਜ਼ਰ ਕੁਪੱਤੀ ਮੇਰੀ।
ਕਦੇ ਜੋਰ ਪਰਾਏ ਨਾ ਸੱਜਣਾ ਪਾਇਆ ਕਿਸੇ ਕਿਨਾਰਾ।
ਬਿਨ ਤੇਰੇ ਸੱਜਣਾ ਵੇ ਮੇਰਾ
ਹੋਰ ਨਾ ਕੋਈ ਸਹਾਰਾ।
ਮਿਠੀਆਂ ਵੀ ਜਗਤ ਦੀਆਂ ਦਿਲ ਦੇ
ਉੱਪਰ ਚਲਾਉਂਦੀਆਂ ਆਰੇ।
ਰੋਸੇ ਵੀ ਪਰ ਤੇਰੇ ਸੱਜਣਾ
ਲੱਗਦੇ ਅੱਤ ਪਿਆਰੇ।
ਆ ਫੜ ਲੈ ਬਾਂਹ ਮੇਰੀ
ਮਿੰਨਤਾਂ ਕਰੇ ਪਨਾਗ ਵਿਚਾਰਾ।
ਬਿਨ ਤੇਰੇ ਸੱਜਣਾ ਵੇ ਮੇਰਾ
ਹੋਰ ਨਾ ਕੋਈ ਸਹਾਰਾ।
No comments:
Post a Comment