ਕੀਹਦੇ ਹੱਥ ਸੁਨੇਹਾ ਘੱਲਾਂ
ਇਸ ਮਨ ਦੀਆਂ ਖਾਹਸ਼ਾਂ ਨੂੰ
ਕਿੱਦਾਂ ਬੰਨ੍ਹ ਮਾਰ ਕੇ ਠੱਲ੍ਹਾਂ।
ਪਰਦੇਸੀਂ ਟੁਰ ਗਏ ਨੂੰ ਕੀਹਦੇ ਹੱਥ ਸੁਨੇਹਾ ਘੱਲਾਂ।
ਮੁੜ ਕੇ ਨਾ ਆਇਆ ਹੈ ਲੰਮੀ ਤੁਰ ਗਿਆ ਮਾਰ ਉਡਾਰੀ।
ਹੋ ਕਮਲ਼ੀ ਚੱਲੀ ਹੈ ਪਿੱਛੇ ਰਹਿ ਗਈ ਕੂੰਜ ਵਿਚਾਰੀ।
ਵਗ ਤੁਰਦੀਆਂ ਅੱਖਾਂ ਚੋਂ ਉੱਠਦੀਆਂ ਜੋ ਦਿਲ ਦੇ ਵਿੱਚ ਛੱਲਾਂ।
ਪਰਦੇਸੀਂ ਟੁਰ ਗਏ ਨੂੰ ਕੀਹਦੇ ਹੱਥ ਸੁਨੇਹਾ ਘੱਲਾਂ।
ਕਰਦਾ ਨਾ ਫੋਨ ਕਦੇ ਕਿੰਝ ਕੋਈ ਦਿਲ ਦਾ ਦੁੱਖੜਾ ਫੋਲੇ।
ਪਾ ਚੂਰੀ ਥੱਕ ਗਈ ਹਾਂ ਨਾ ਕੋਈ ਕਾਗ ਬਨੇਰੇ ਬੋਲੇ।
ਇਸ ਪੀੜ ਜਿਗਰ ਦੀ ਨੂੰ ਸਮਝ ਨਾ ਆਵੇ ਕੀਕਣ ਝੱਲਾਂ।
ਪਰਦੇਸੀਂ ਟੁਰ ਗਏ ਨੂੰ ਕੀਹਦੇ ਹੱਥ ਸੁਨੇਹਾ ਘੱਲਾਂ।
ਰਹਿੰਦੀ ਹਾਂ ਬੈਠੀ ਮੈਂ ਲੈ ਪੀੜਾਂ ਨੂੰ ਵਿੱਚ ਕਲ਼ਾਵੇ।
ਕੋਈ ਦਿਸਦਾ ਦਰਦੀ ਨਾ ਜਿਹੜਾ ਦਿਲ ਦਾ ਦੁੱਖ ਵੰਡਾਵੇ।
ਕੱਲੀ ਬਹਿ ਰਾਤਾਂ ਨੂੰ ਖੁਦ ਨਾਲ਼ ਕਰਦੀ ਰਹਿੰਦੀ ਗੱਲਾਂ।
ਪਰਦੇਸੀਂ ਟੁਰ ਗਏ ਨੂੰ ਕੀਹਦੇ ਹੱਥ ਸੁਨੇਹਾ ਘੱਲਾਂ।
ਨਾ ਪਤਾ ਪਨਾਗਾ ਵੇ ਮੁੜ ਕੇ ਕਦ ਉਸ ਨੇ ਘਰ ਆਉਣਾ।
ਇਸ ਜਿੰਦ ਤੜਫਦੀ ਨੂੰ ਲੈ ਕੇ ਬਾਂਹੀਂ ਕੋਲ਼ ਬਿਠਾਉਣਾ।
ਕਿਤੇ ਆਉਣੋ ਪਹਿਲਾਂ ਹੀ ਨਾ ਮੈਂ ਦਰ ਅਗਲਾ ਜਾ ਮੱਲਾਂ।
ਪਰਦੇਸੀਂ ਟੁਰ ਗਏ ਨੂੰ ਕੀਹਦੇ ਹੱਥ ਸੁਨੇਹਾ ਘੱਲਾਂ।
No comments:
Post a Comment