ਗੀਤ
ਗੱਲ ਦਿਲ ਦੀ ਜ਼ਬਾਨੋਂ ਕਿਉਂ
ਨਹੀਂ ਕਹਿੰਦੇ ਸੋਹਣਿਓਂ।
ਕਾਹਤੋਂ ਚੁੱਪ ਚੁੱਪ ਹਰ ਵੇਲ਼ੇ
ਰਹਿੰਦੇ ਸੋਹਣਿਓਂ।
ਗੱਲ ਦਿਲ ਦੀ ਜ਼ਬਾਨੋਂ ਕਿਉਂ
ਨਹੀਂ ਕਹਿੰਦੇ ਸੋਹਣਿਓਂ।
ਅੱਖਾਂ ਵਿੱਚ ਚੁੱਕੀ ਫਿਰਦੇ
ਸਵਾਲ ਬੇ-ਹਿਸਾਬ।
ਜਿਹੜੇ ਮੰਗਦੇ ਨੇ ਕਿਸੇ ਕੋਲ਼ੋਂ
ਅਪਣਾ ਜਵਾਬ।
ਏਨਾ ਭਾਰ ਕਾਹਦੇ ਵਾਸਤੇ ਹੋ
ਸਹਿੰਦੇ ਸੋਹਣਿਓਂ।
ਗੱਲ ਦਿਲ ਦੀ ਜ਼ਬਾਨੋਂ ਕਿਉਂ
ਨਹੀਂ ਕਹਿੰਦੇ ਸੋਹਣਿਓਂ।
ਕਿਹੜਾ ਲੱਭਦੇ ਹੋ ਦਿਨ ਕਿਹੜੀ
ਭਾਲ਼ਦੇ ਤਰੀਕ।
ਬੈਠੇ ਲਾਈ ਕਿਹੜੀ ਦੱਸੋ ਸ਼ੁਭ
ਘੜੀ ਦੀ ਉਡੀਕ।
ਲਾਹ ਕੇ ਭਾਰ ਕਿਉਂ ਨਹੀਂ ਸੌਖੇ
ਹੋ ਕੇ ਬਹਿੰਦੇ ਸੋਹਣਿਓਂ।
ਗੱਲ ਦਿਲ ਦੀ ਜ਼ਬਾਨੋਂ ਕਿਉਂ
ਨਹੀਂ ਕਹਿੰਦੇ ਸੋਹਣਿਓਂ।
ਲਾਹ ਕੇ ਸੰਗ ਤੇ ਸ਼ਰਮ ਦੱਸੋ
ਦਿਲ ਵਾਲ਼ੀ ਗੱਲ।
ਜੀਹਨੂੰ ਰਹੇ ਹੋ ਉਡੀਕ ਨਹੀਂ
ਆਉਣੀ ਕਦੇ ਕੱਲ੍ਹ।
ਛੱਡ ਔਝੜਾਂ ਕਿਉਂ ਸਿੱਧੇ ਰਾਹ
ਨਹੀਂ ਪੈਂਦੇ ਸੋਹਣਿਓਂ।
ਗੱਲ ਦਿਲ ਦੀ ਜ਼ਬਾਨੋਂ ਕਿਉਂ
ਨਹੀਂ ਕਹਿੰਦੇ ਸੋਹਣਿਓਂ।
ਕੱਲ੍ਹ ਕਾਲ਼ ਦਾ ਹੈ ਨਾਮ ਸਾਰੇ
ਕਹਿੰਦੇ ਨੇ ਸਿਆਣੇ।
ਸੁਖੀ ਰਹਿੰਦਾ ਅਹਿਮੀਅਤ ਜੋ
ਅੱਜ ਦੀ ਪਛਾਣੇ।
ਕਿਹਾ ਮੰਨ ਕਿਉਂ ਪਨਾਗ ਦਾ
ਨਹੀਂ ਲੈਂਦੇ ਸੋਹਣਿਓਂ।
ਗੱਲ ਦਿਲ ਦੀ ਜ਼ਬਾਨੋਂ ਕਿਉਂ
ਨਹੀਂ ਕਹਿੰਦੇ ਸੋਹਣਿਓਂ।
No comments:
Post a Comment