ਗੀਤ
ਜੋ ਸੇਵਾ ਕਰਨੀ ਚਾਹੁੰਦੇ ਨੇ
ਜੋ ਸੇਵਾ ਕਰਨੀ ਚਾਹੁੰਦੇ ਨੇ ਉਹ
ਕੁਰਸੀ ਦੀ ਮੰਗ ਕਰਦੇ ਨਹੀਂ।
ਪਾ ਜੁੱਤੀ ਮੋਢੇ ਰੱਖ ਪਰਨਾ ਤੁਰ
ਪੈਂਦੇ ਸਫ਼ਰੋਂ ਡਰਦੇ ਨਹੀਂ।
ਕੁਰਸੀ ਤੇ ਬਹਿ ਜੋ ਹੁੰਦੀ ਹੈ ਉਹ
ਸੇਵਾ ਨਹੀਂ ਹਕੂਮਤ ਹੈ।
ਹੱਥ ਦੇ ਵਿੱਚ ਹੁੰਦਾ ਡੰਡਾ ਹੈ ਤੇ
ਜੀਭ ਤੇ ਹੁੰਦੀ ਤੂਹਮਤ ਹੈ।
ਉੰਗਲ਼ ਜੇ ਕੋਈ ਉੱਠਦੀ ਹੈ ਕੁਰਸੀ ਤੇ
ਬੈਠੇ ਜਰਦੇ ਨਹੀਂ।
ਜੋ ਸੇਵਾ ਕਰਨੀ ਚਾਹੁੰਦੇ ਨੇ ਉਹ
ਕੁਰਸੀ ਦੀ ਮੰਗ ਕਰਦੇ ਨਹੀਂ।
ਜੋ ਸੱਚਮੁੱਚ ਸੇਵਾ ਕਰਦੇ ਨੇ ਉਹ ਏਧਰ ਓਧਰ ਤੱਕਦੇ ਨਹੀਂ।
ਫਲ਼ ਦੇਵੇਗਾ ਕੋਈ ਸੇਵਾ ਦਾ ਉਹ ਆਸ ਕਦੇ
ਵੀ ਰੱਖਦੇ ਨਹੀਂ।
ਤਾਕਤ ਦੌਲਤ ਜਾਂ ਸ਼ੁਹਰਤ ਤੇ ਕਦੇ ਭੁੱਲ
ਕੇ ਵੀ ਅੱਖ ਧਰਦੇ ਨਹੀਂ।
ਜੋ ਸੇਵਾ ਕਰਨੀ ਚਾਹੁੰਦੇ ਨੇ ਉਹ
ਕੁਰਸੀ ਦੀ ਮੰਗ ਕਰਦੇ ਨਹੀਂ।
ਕੋਈ ਹੋਰ ਜੇ ਸੇਵਾ ਵੱਧ ਕਰੇ ਕਦੇ ਵੇਖ
ਓਸ ਨੂੰ ਸੜਦੇ ਨਹੀਂ।
ਕਿਸੇ ਦੂਜੇ ਤਾਂਈਂ ਪਛਾੜਨ ਲਈ ਕਦੇ
ਬੈਠ ਸਾਜਸ਼ਾਂ ਘੜਦੇ ਨਹੀਂ।
ਸਗੋਂ ਤੱਕ ਤੱਕ ਕੇ ਖੁਸ਼ ਹੁੰਦੇ ਨੇ ਇਹ
ਵਾਂਗ ਲੂਣ ਦੇ ਖਰਦੇ ਨਹੀਂ।
ਜੋ ਸੇਵਾ ਕਰਨੀ ਚਾਹੁੰਦੇ ਨੇ ਉਹ
ਕੁਰਸੀ ਦੀ ਮੰਗ ਕਰਦੇ ਨਹੀਂ।
ਦੂਜੇ ਨੂੰ ਮਾੜਾ ਆਖਣ ਨਾ ਕਦੇ ਖੁਦ
ਨੂੰ ਚੰਗਾ ਕਹਿੰਦੇ ਨਹੀਂ।
ਹੱਸ ਅਪਣੀ ਨਿੰਦਾ ਸਹਿ ਲੈਂਦੇ ਕਦੇ ਮਨ
ਤੇ ਲਾ ਕੇ ਬਹਿੰਦੇ ਨਹੀਂ।
ਬਣ ਧੂੜ ਪਨਾਗਾ ਰਹਿੰਦੇ ਨੇ ਕਮੀਆਂ ਤੇ
ਪਾਉਂਦੇ ਪਰਦੇ ਨਹੀਂ।
ਜੋ ਸੇਵਾ ਕਰਨੀ ਚਾਹੁੰਦੇ ਨੇ ਉਹ
ਕੁਰਸੀ ਦੀ ਮੰਗ ਕਰਦੇ ਨਹੀਂ।
No comments:
Post a Comment