ਛੱਡ ਦੇ ਮੇਰਾ ਮੇਰਾ ਕਰਨਾ, ਸਿੱਖ ਲੈ ਤੇਰਾ ਤੇਰਾ ਕਰਨਾ।
ਦੁਨੀਆਂ ਨੂੰ ਤੂੰ ਛੱਡ ਡਰਾਉਣਾ, ਸਿੱਖ ਲੈ ਉਸ ਮਾਲਕ ਤੋਂ ਡਰਨਾ।
ਉੱਪਰ ਤੋਂ ਜਦ ਸੱਦਾ ਆਇਆ ਸਭ ਕੁੱਝ ਛੱਡ ਕੇ
ਪੈਣਾ ਜਾਣਾ।
ਇੱਕ ਵੀ ਸਾਹ ਨਹੀਂ ਮੰਗਿਆਂ ਮਿਲਣਾ ਵਿੱਚੇ ਈ ਰਹਿ ਜਾਊ ਪੀਣਾ ਖਾਣਾ।
ਜਿੱਥੇ ਹੈ ਸਭ ਓਥੇ ਈ ਰਹਿ ਜਾਊ, ਦੇਣਾ ਲੈਣਾ, ਚੱਕਣਾ ਧਰਨਾ।
ਛੱਡ ਦੇ ਮੇਰਾ ਮੇਰਾ ਕਰਨਾ, ਸਿੱਖ ਲੈ ਤੇਰਾ ਤੇਰਾ ਕਰਨਾ।
ਤੇਰੀ ਦੌਲਤ ਤਾਕਤ ਤੇਰਾ ਲਿਖਿਆ ਲੇਖ ਮਿਟੇਣਾ ਹੈ ਨਹੀਂ।
ਜਿਨ੍ਹਾਂ ਵਾਸਤੇ ਮਾਰੇਂ ਠੱਗੀਆਂ ਸਾਥ ਕਿਸੇ ਨੇ ਦੇਣਾ ਹੈ ਨਹੀਂ।
ਅਪਣਾ ਕੀਤਾ ਆਪ ਭੁਗਤਣਾ ਅਪਣੇ ਕਰਮੀ ਡੁੱਬਣਾ ਤਰਨਾ।
ਛੱਡ ਦੇ ਮੇਰਾ ਮੇਰਾ ਕਰਨਾ, ਸਿੱਖ ਲੈ ਤੇਰਾ ਤੇਰਾ ਕਰਨਾ।
ਕੱਠੀ ਕੀਤੀ ਦੌਲਤ ਦੇ ਨਾਲ਼ ਭਲਾ ਕਿਸੇ ਦਾ ਕਰਨਾ ਸਿੱਖ ਲੈ।
ਦੁੱਖ ਵੰਡਾਉਣਾ ਸਿੱਖ ਦੁਖੀਆਂ ਦਾ, ਪੀੜ ਕਿਸੇ ਦੀ ਹਰਨਾ ਸਿੱਖ ਲੈ।
ਆਫ਼ਤ ਦੀ ਥਾਂ ਸਿੱਖ ਲੈ ਮਿੱਤਰਾ ਰਹਿਮਤ ਬੂੰਦਾਂ ਬਣ ਕੇ ਵਰ੍ਹਨਾ।
ਛੱਡ ਦੇ ਮੇਰਾ ਮੇਰਾ ਕਰਨਾ, ਸਿੱਖ ਲੈ ਤੇਰਾ ਤੇਰਾ ਕਰਨਾ।
ਰੋਂਦੇ ਕਿਸੇ ਨੂੰ ਗਲ਼ ਨਾਲ਼ ਲਾ ਲੈ, ਭੁੱਖੇ ਦੇ ਮੂੰਹ ਬੁਰਕੀ ਪਾ ਲੈ।
ਜ਼ਖ਼ਮ ਕਿਸੇ ਦੇ ਦੁਖਦੇ ਉੱਤੇ ਲਾ ਕੇ ਮਲ੍ਹਮ ਪੁੰਨ ਕਮਾ ਲੈ।
ਮਾਰੂੰ ਮਾਰੂੰ ਕਰਨਾ ਛੱਡ ਕੇ ਸਿੱਖ ਲੈ ਆਪ ਕਿਸੇ ਲਈ ਮਰਨਾ।
ਛੱਡ ਦੇ ਮੇਰਾ ਮੇਰਾ ਕਰਨਾ, ਸਿੱਖ ਲੈ ਤੇਰਾ ਤੇਰਾ ਕਰਨਾ।
ਅੱਗ ਦਿਲਾਂ ਨੂੰ ਲਾਉਣਾ ਛੱਡ ਦੇ, ਲੱਗੀ ਅੱਗ ਨੂੰ ਸਿੱਖ ਬੁਝਾਉਣਾ।
ਜਾਏ ਬੀਤਦਾ ਵਕਤ ਪਨਾਗਾ, ਮੁੜ ਕੇ ਇਹਨੇ ਹੱਥ ਨਾ ਆਉਣਾ।
ਨੇਕੀ ਕਰੀ ਬਚਾਊ ਕੇਵਲ ਜਦ ਦੋਜ਼ਖ਼ ਦੀ ਅੱਗ ਨੇ ਵਰ੍ਹਨਾ।
ਛੱਡ ਦੇ ਮੇਰਾ ਮੇਰਾ ਕਰਨਾ, ਸਿੱਖ ਲੈ ਤੇਰਾ ਤੇਰਾ ਕਰਨਾ।
No comments:
Post a Comment