ਅਕਲ ਨਾ ਆਉਂਦੀ ਰਾਸ
ਕਦੇ ਤਲਵਾਰਾਂ ਨੂੰ।
ਸੂਲ਼ੀ ਮਿਲੇ ਇਨਾਮ
ਅਕਲ ਬਰਦਾਰਾਂ ਨੂੰ।
ਕਦਰ ਨਾ ਜੱਗ ਤੇ
ਕਰਦਾ ਕੋਈ ਸਿਆਣਪ ਦੀ
ਮੂਰਖ ਟੋਲਾ ਸਾਂਭ
ਲਏ ਸਤਿਕਾਰਾਂ ਨੂੰ।
ਗੱਲ ਅਕਲ ਦੀ ਕੋਈ
ਸਿਆਣਾ ਕਰ ਦਏ ਜੇ
ਪੈ ਜਾਂਦਾ ਹੈ ਖਤਰਾ
ਝੱਟ ਸਰਕਾਰਾਂ ਨੂੰ।
ਕਿਹੋ ਜਿਹਾ ਇਹ
ਮੌਸਮ ਚੰਦਰਾ ਆਇਆ ਹੈ
ਲਾ ਦਿੱਤਾ ਹੈ ਜਿਸ
ਨੇ ਗ੍ਰਹਿਣ ਬਹਾਰਾਂ ਨੂੰ।
ਅੰਦਰ ਬਹਿ ਕੇ ਕਦ
ਤੱਕ ਵਕਤ ਗੁਜ਼ਾਰਾਂਗੇ
ਤਾਲ਼ਾ ਕਦ ਤੱਕ
ਲੱਗਿਆ ਰਹੂ ਬਜ਼ਾਰਾਂ ਨੂੰ?
ਤੀਰ ਨਿਸ਼ਾਨੇ ਪੈਣ
ਨਾ ਤੀਰ ਅੰਦਾਜ਼ਾਂ ਦੇ
ਭੁੱਲ ਗਿਆ ਚੜ੍ਹਨਾ
ਘੋੜੇ ਸ਼ਾਹ ਅਸਵਾਰਾਂ ਨੂੰ।
ਨਜ਼ਦੀਕੀ ਦੀ ਥਾਂ ਹੈ
ਲੈ ਲਈ ਦੂਰੀਆਂ ਨੇ
ਤਰਸ ਗਏ ਨੇ ਯਾਰ
ਮਿਲਣ ਲਈ ਯਾਰਾਂ ਨੂੰ।
ਚਾਰੇ ਪਾਸੇ ਚੁੱਪ
ਪਨਾਗਾ ਛਾਈ ਹੈ
ਬੋਲਣ ਦਾ ਹੱਕ ਟੀ ਵੀ ਜਾਂ ਅਖ਼ਬਾਰਾਂ ਨੂੰ।
No comments:
Post a Comment