ਮੰਗੀ ਮੌਤ ਜੇ
ਕਿਤੋਂ ਮਿਲ ਜਾਵੇ ਹੱਸ ਕੇ ਮੈਂ ਗਲ਼ ਲਾ ਲਵਾਂ।
ਪਰ ਦੋਸ਼ ਨਾ ਕਿਸੇ
ਸਿਰ ਆਵੇ ਹੱਸ ਕੇ ਮੈਂ ਗਲ਼ ਲਾ ਲਵਾਂ।
ਰਹੀ ਨਾ ਤਮੰਨਾ ਹੋਰ
ਜੱਗ ਉੱਤੇ ਜੀਣ ਦੀ।
ਮੁੱਕ ਗਈ ਸਧਰ ਸਾਰੀ
ਖਾਣ ਦੀ ਤੇ ਪੀਣ ਦੀ।
ਵੱਢ ਚੂੰਢੀਆਂ ਵਕਤ
ਤੜਪਾਵੇ, ਹੱਸ ਕੇ ਮੈਂ ਗਲ਼ ਲਾ ਲਵਾਂ।
ਮੰਗੀ ਮੌਤ ਜੇ
ਕਿਤੋਂ ਮਿਲ ਜਾਵੇ ਹੱਸ ਕੇ ਮੈਂ ਗਲ਼ ਲਾ ਲਵਾਂ।
ਖਾਸ ਕਿਸੇ ਯਾਰ
ਵਾਂਗ ਮੌਤ ਨੂੰ ਉਡੀਕਾਂ ਮੈਂ।
ਮਾਰ ਮਾਰ ਕੰਧਾਂ ਤੇ
ਮਿਟਾਉਂਦਾ ਰਹਾਂ ਲੀਕਾਂ ਮੈਂ।
ਜਿੰਦ ਰਹਿਗੀ ਬਣ
ਹੌਕੇ ਅਤੇ ਹਾਵੇ, ਹੱਸ ਕੇ ਮੈਂ ਗਲ਼ ਲਾ ਲਵਾਂ।
ਮੰਗੀ ਮੌਤ ਜੇ
ਕਿਤੋਂ ਮਿਲ ਜਾਵੇ ਹੱਸ ਕੇ ਮੈਂ ਗਲ਼ ਲਾ ਲਵਾਂ।
ਖੜ੍ਹ ਕੇ ਬਰੂਹਾਂ
ਵਿੱਚ ਤੱਕਾਂ ਉਹਦਾ ਰਾਹ ਮੈਂ।
ਸੁਣਦਾ ਬਿੜਕ ਰਹਾਂ
ਰੋਕ ਰੋਕ ਸਾਹ ਮੈਂ।
ਕਿਤੇ ਲੱਗ ਨਾ
ਭੁਲੇਖਾ ਉਹਨੂੰ ਜਾਵੇ, ਹੱਸ ਕੇ ਮੈਂ ਗਲ਼ ਲਾ ਲਵਾਂ।
ਮੰਗੀ ਮੌਤ ਜੇ
ਕਿਤੋਂ ਮਿਲ ਜਾਵੇ ਹੱਸ ਕੇ ਮੈਂ ਗਲ਼ ਲਾ ਲਵਾਂ।
ਨਿੱਕੀ ਜੇਹੀ ਭੁੱਲ
ਦਿੱਤੇ ਬਦਲ ਹਾਲਾਤ ਨੇ।
ਖੂਹ ਦੇ ਵਿੱਚ ਧੱਕਾ
ਦੇ ਤਾ ਅੰਨ੍ਹੇ ਜਜ਼ਬਾਤ ਨੇ।
ਵੇਲ਼ਾ ਭੁੱਲਿਆ ਪਨਾਗ
ਤੋਂ ਨਾ ਜਾਵੇ, ਹੱਸ ਕੇ ਮੈਂ ਗਲ਼ ਲਾ ਲਵਾਂ।
ਮੰਗੀ ਮੌਤ ਜੇ
ਕਿਤੋਂ ਮਿਲ ਜਾਵੇ ਹੱਸ ਕੇ ਮੈਂ ਗਲ਼ ਲਾ ਲਵਾਂ।
No comments:
Post a Comment