ਮੁੜ ਮੁੜ ਕੇ ਜੋ ਰੌਲ਼ਾ ਪਾਉਣ ਤਿਰੰਗੇ ਦਾ।
ਸਿਆਸਤ ਲਈ ਹਥਿਆਰ ਬਣਾਉਣ ਤਿਰੰਗੇ ਦਾ।
ਕਰਨ ਲਈ ਬਦਨਾਮ ਸੜਕ ਤੇ ਬੈਠਿਆਂ ਨੂੰ
ਕਰ ਸਾਜਸ਼ ਅਪਮਾਨ ਕਰਾਉਣ ਤਿਰੰਗੇ ਦਾ।
ਪੂੰਝਣ ਅਪਣਾ ਮੁੜ੍ਹਕਾ ਨਾਲ਼ ਤਿਰੰਗੇ ਜੋ
ਸਾਨੂੰ ਉਹ ਸਤਿਕਾਰ ਸਿਖਾਉਣ ਤਿਰੰਗੇ ਦਾ।
ਦੇਸ਼ ਧ੍ਰੋਹੀ ਅੱਜ ਉਨ੍ਹਾਂ ਨੂੰ ਦੱਸਦੇ ਇਹ
ਮਰ ਕੇ ਵੀ ਜੋ ਕੱਫਣ ਪਾਉਣ ਤਿਰੰਗੇ ਦਾ।
ਭੰਡ ਰਹੇ ਕਹਿ ਕਹਿ ਅੱਤਵਾਦੀ ਉਹਨਾਂ ਨੂੰ
ਜਾਨ ਵਾਰ ਜੋ ਮਾਣ ਬਚਾਉਣ ਤਿਰੰਗੇ ਦਾ।
ਰੱਖ ਕਮਲ ਤੋਂ ਨੀਂਵਾਂ ਜੋ ਲਹਿਰਾਉਂਦੇ ਨੇ
ਬਹਿ ਕੁਰਸੀ ਤੇ ਗੋਗਾ ਗਾਉਣ ਤਿਰੰਗੇ ਦਾ।
ਲਾਠੀ ਮਾਰ ਕੇ ਕਰਦੇ ਦੇਖੇ ਬੇਅਦਬੀ
ਖ਼ੁਦ ਨੂੰ ਰਾਖਾ ਜੋ ਅਖਵਾਉਣ ਤਿਰੰਗੇ ਦਾ।
ਅੰਨਦਾਤੇ ਦਾ ਅਕਸ ਪਨਾਗ ਵਿਗਾੜਨ ਲਈ
ਫੜ ਝੰਡਾ ਹੱਥ ਨਾਹਰਾ ਲਾਉਣ ਤਿਰੰਗੇ ਦਾ।
No comments:
Post a Comment