ਜੀਵਨ ਕੈਦ ਹੈ ਮੌਤ ਦੇ ਪਰ ਵਣਜਾਰੇ ਖੁੱਲ੍ਹੇ ਫਿਰਦੇ ਨੇ।
ਅੰਮ੍ਰਿਤ ਕਹਿ ਜੋ ਜ਼ਹਿਰ ਵੇਚਦੇ ਸਾਰੇ ਖੁੱਲ੍ਹੇ ਫਿਰਦੇ ਨੇ।
ਕਿਹੜਾ ਪਾਵੇ ਨੱਥ ਜੁਰਮ ਨੂੰ, ਅਪ੍ਰਾਧੀ ਨੂੰ ਕਾਬੂ ਕਰ ਕੇ
ਕੁੱਤੀ ਰਲ਼ ਗਈ ਚੋਰਾਂ ਸੰਗ, ਹਤਿਆਰੇ ਖੁੱਲ੍ਹੇ ਫਿਰਦੇ ਨੇ।
ਸਹੁੰਆਂ ਖਾ ਕੇ ਹਾਕਮ ਸੁੱਤੇ, ਢੋਲ ਵਜਾਇਆਂ ਵੀ ਨਾ ਜਾਗਣ
ਵਗਦੇ ਹੜ੍ਹ ਨਸ਼ਿਆਂ ਦੇ, ਭੰਨ ਕਿਨਾਰੇ, ਖੁੱਲ੍ਹੇ ਫਿਰਦੇ ਨੇ।
ਚੌਕੀਦਾਰ
ਚੋਰ ਬਣ ਜਾਂਦੇ, ਚੋਰਾਂ ਹੱਥੋਂ ਮਾਰਾਂ ਖਾ ਵੀ
ਚੋਰ
ਰਾਖਿਆਂ ਪਾਲ਼ੇ, ਬਣੇ ਵਿਚਾਰੇ, ਖੁੱਲ੍ਹੇ ਫਿਰਦੇ ਨੇ।
ਕਾਤਲ ਦੇ ਹੱਥ ਗ੍ਰੰਥ ਪਵਿੱਤਰ ਕਾਨੂੰਨਾਂ ਦੇ ਵਿਕ ਗਏ ਸਾਰੇ
ਗਲ਼ੀਆਂ ਵਿੱਚ ਪਰ ਸਜ਼ਾ ਦੇਣ ਦੇ ਲਾਰੇ ਖੁੱਲ੍ਹੇ ਫਿਰਦੇ ਨੇ।
ਬੇਦੋਸ਼ੇ ਗਰਦਾਨੇ ਦੋਸ਼ੀ, ਬੈਠੇ ਬੰਦ ਸਲਾਖਾਂ ਪਿੱਛੇ
ਸੀਖਾਂ ਦੇ ਅਧਿਕਾਰੀ, ਰਾਜ ਦੁਲਾਰੇ, ਖੁੱਲ੍ਹੇ ਫਿਰਦੇ ਨੇ।
ਏਸ ਚਮਨ ਦਾ ਯਾਰ ਪਨਾਗਾ ਬੱਸ ਹੁਣ ਤਾਂ ਹੈ ਰੱਬ ਹੀ ਰਾਖਾ
ਵੱਗ ਉਜਾੜਾ ਪਾਉਂਦੇ, ਆਪ ਮੁਹਾਰੇ, ਖੁੱਲ੍ਹੇ ਫਿਰਦੇ ਨੇ।
No comments:
Post a Comment